बाँकेको नरैनापुर गाउँपालिकाका जनप्रतिनिधिले पदभार ग्रहण गरेका छन् ।
नरैनापुर गाउँपालिका अध्यक्ष इस्तियाक अहमद शाह, उपाध्यक्ष जयन्ती देवी श्रीवास्तव सहित ६ वटै वडाका अध्यक्षले पदभार ग्रहण गरिसकेका छन् ।
गाउँपालिका अध्यक्ष शाहले पदभार ग्रहण गर्दै गर्दा ५ निर्णय गराएका छन् । आगामी आर्थिक वर्ष २०७९/०८० बाट कार्यान्वयन हुने गरी शाहले ५ निर्णयमा हस्ताक्षर गरेका छन् । 
नरैनापुर गाउँपालिकाको बाँकी रहेका स्थानमा बिधुतिकरण कार्य सम्पन्न गरी प्रत्येक वडाको चौकमा हाइमाष्ट फल्ड लाइट जडान गर्ने निर्णय गरेका छन् ।
नरैनापुर १ महतानियामा ३ करोडको लागतमा माध्यमिक विद्यालय निर्माण गर्ने, गाउँपालिका अध्यक्षको पारिश्रमिकबाट हरेक बर्ष एस.ई.ई. मा सबै भन्दा उत्कृष्ट GPA ल्याउने एक बिधार्थीलाई ल्यापटप दिने, जय किसान माविलाई क्याम्पस बनाउने, हरेक माध्यमिक विद्यालयलाई एक/एक वटा बस प्रदान गर्ने निर्णय गरेको गाउँपालिका प्रमुख प्रशासकीय अधिकृत भरत बस्नेतले जानकारी दिए ।
‘पदभार ग्रहणका क्रममा केही निर्णय गरियो, आगामी आर्थिक वर्षदेखि कार्यान्वय हुन्छ,’ अध्यक्ष शाहले भने, ‘भएका निर्णय कार्यान्वयन गर्न सकेमात्रै जनताको पक्षमा धेरै हुने छ भन्ने अपेक्षा गरेका छौं ।’
